काठमाडौं– २७ देखि २९ मंसिरसम्म हुने नेकपा एमालेको ११औँ महाधिवेशनमा पार्टी अध्यक्षका लागि केपी ओलीसँग वरिष्ठ उपाध्यक्ष ईश्वर पोखरेलले प्रतिष्पर्धा गर्ने घोषणासँगै एमालेभित्रको धु्रवीकरण तीव्र भएको छ ।

बिहीबार भएको पार्टीको सचिवालय बैठकमा पोखरेलले अध्यक्ष ओलीलाई ‘अब तपाईं बिदा लिनुस्’ भन्दै आफू अध्यक्षमा उठ्ने घोषणा गरेका थिए । पूर्वराष्ट्रपति विद्या भण्डारीलाई सदस्यताको तगारो तेस्र्याएर रोकेपछि भण्डारीकै समर्थनमा पोखरेल प्यानल नै बनाउने ढंगले अघि बढेका छन् ।

पार्टी अध्यक्षमा आफूलाई निर्विकल्प अध्यक्षको रूपमा प्रस्तुत गरिरहेका ओलीका लागि वरिष्ठ उपाध्यक्ष ईश्वर पोखरेलको घोषणा नयाँ चुनौती बनेको छ । ओली–पोखरेल आमनेसामने हुने निश्चित भएपछि दुवै समूहले प्यानल नै बनाएर प्रतिस्पर्धा गर्ने आन्तरिक तयारी भइरहेको जनाइएको छ ।

पोखरेलको प्यानलमा अहिलेका पदाधिकारीमध्ये ३ उपाध्यक्ष युवराज ज्ञवाली, अष्टलक्ष्मी शाक्य, सुरेन्द्र पाण्डे तथा सचिवहरू योगेश भट्टराई र गोकर्ण विष्ट खुलेका छन् ।

उपाध्यक्ष विष्णु पौडेल तथा उपमहासचिव पृथ्वी सुब्बा गुरुङ भने अहिलेसम्म तटस्थजस्तै रहेका छन् । पौडेल र गुरुङ पोखरेलको समूहमा आउने पोखरेल निकट नेताहरूको दाबी छ ।

यता, ओलीको पक्षमा उपाध्यक्ष रामबहादुर थापा बादल र गुरु बराल प्रष्ट खुलेका छन् । महासचिव शंकर पोखरेल, उपमहासचिव प्रदीप ज्ञवाली र विष्णु रिमाल पनि ओलीको पक्षमा खुलेका छन् । ओलीको पक्षमा सचिवहरू लेखराज भट्ट, पद्मा अर्याल, रघुवीर महासेठ देखिए पनि सचिव छविलाल विश्वकर्मा भने अहिलेसम्म तटस्थजस्तै देखिएका छन् ।

एमालेको परिवर्तित विधानअनुसार अब बन्ने एमाले केन्द्रीय पदाधिकारी संख्या १५ मात्र हुनेछ । यसअघि १९ सदस्यीय पदाधिकारी रहेको एमालेमा गत विधान महाधिवेशनले गरेको व्यवस्थाअनुसार अध्यक्ष १, उपाध्यक्ष ३, महासचिव १, उपमहासचिव ३ र सचिव ७ जना निर्वाचित हुनेछन् ।

यस्तोमा अध्यक्ष ओलीले आफ्नो प्यानलबाट पदाधिकारीमा नयाँ अनुहारलाई समेट्ने प्रयास गर्नेछन् । त्यमध्ये महेश बस्नेत, हिक्मत कार्की, सूर्य थापा र रामकुमारी झाँक्रीलाई सचिव बनाउने ओलीको तयारी रहेको बताइएको छ । पोखरेल पक्षले भने कर्णबहादुर थापा, गोकुल बाँस्कोटालगायतलाई पदाधिकारीमा ल्याउने सम्भावना रहेको बताइएको छ ।

वरिष्ठ उपाध्यक्ष पोखरेल यसअघि पूर्वराष्ट्रपति विद्या भण्डारीलाई एमाले अध्यक्ष बनाउन लागि परेका थिए । तर, भण्डारीको सदस्यता नै खारेज भएपछि पोखरेलले अध्यक्ष उठ्ने भन्दै आफू निकटकासँग परामर्श थाले । उनलाई केही दिनअघि अर्का उपाध्यक्ष सुरेन्द्र पाण्डेले ‘तपाईं अन्तिमसम्म अडिनुहुन्छ कि हुन्न रु नत्र म अध्यक्षमा उठ्छु’ भन्दै प्रश्न गरेका थिए । पाण्डेको जबाफमा पोखरेलले आफू भित्तैमा पुगेकाले अब पछि नहट्ने भन्दै अध्यक्षमा प्रतिस्पर्धा गर्ने विश्वास दिलाएका थिए ।

७ वर्षदेखि एमालेमा एकछत्र राज गरेका अध्यक्ष केपी शर्मा ओलीलाई चुनौती दिन पोखरेलको समूह आउन लागेको एकाथरी नेताको भनाइ छ । पूर्वराष्ट्रपति विद्या भण्डारीले अध्यक्ष उठ्ने संकेत गरेपछि उनको सदस्यता ओलीले खारेज गरेका थिए । भण्डारीको सदस्यता खारेजीसँगै एमालेमा ओलीविरुद्ध अर्को आलोचना हुँदै आएको छ । अहिले बहुमत पदाधिकारी विद्यालाई पार्टीमा स्वागत गर्नुपर्ने भन्दै ओलीको विरुद्धमा उभिएका छन् ।

अहिले उनै भण्डारीको समर्थनमा पोखरेलले समूह नै बनाएर प्रतिस्पर्धा गर्न लागेको उनी निकट नेताहरूको भनाइ छ । त्यसो त पोखरेल नवौँ र १०औँ महाधिवेशनमा ओलीकै सहयोगीका रूपमा सक्रिय थिए । ओलीले २ कार्यकाल अध्यक्ष भएपछि आफ्नो पालो आउला भनेर आस गरेका पोखरेल विधानमा २ कार्यकाल र उमेरहद हटाएसँगै बिच्किएका हुन् ।

ओलीको विकल्प छैन भन्ने भाष्य गलत भएको पोखरेल निकट नेताहरूको भनाइ छ । ओली–पोखरेलको समूह केन्द्रमा मात्रै होइन जिल्ला र वडाकमिटीसम्म पुग्न थालेको छ । ओली र उनी निकट नेताहरूले एमालेमा ओलीको विकल्प नरहेको र उनको विरुद्ध कोही उभिन नसक्ने र नहुने भन्दै आएका थिए ।

ओलीको उक्त सन्देशलाई अर्काथरीले भने, ‘पार्टीको मार्गदर्शक सिद्धान्त जवज’को बर्खिलाप भएको आरोप लगाएका छन् । ओलीको हेपाह र एकपाखे शैलीले एमालेलाई दिनदिनै धक्का लागेकाले त्यसबाट पार्टीलाई बचाउन पनि ओलीको विकल्पमा जानुपर्ने एक नेताले बताए ।

केही दिन अगाडिको एक कार्यक्रममा ओलीले महाधिवेशनमा आफ्नो निर्देशनात्मक मन्तव्य सकिएपछि कुनै छलफल नहुने बताएका थिए । उनको उक्त भनाइपछि एमालेमा ध्रुवीकरण तीव्र भएको छ । स्रोतका अनुसार पोखरेल निकट नेताहरूले आन्तरिक छलफललाई तीव्र बनाएका छन् । पोखरेल समूह ओली टिमका नेता पनि सामेल गराउन लबिङ गरिरहेको स्रोतले बतायो ।

अहिले ओलीकै टिममा रहेका पनि एकदेखि अर्को सन्तुष्ट नरहेकाले त्यसको लाभ लिने दाउमा पोखरेल समूह लागिपरेको छ । यदि ओली टिमबाट महासचिवमा शंकर पोखरेल दोहोरिने अवस्था आएमा पृथ्वीसुब्बा गुरुङ बिच्कने देखिन्छ ।

अर्कातर्फ शंकर र विष्णु पौडेलका बीचमा पनि लुम्बिनी प्रदेशमा तीव्र मतभेद छ । त्यसैले पौडेल ईश्वरको समूहमा लाग्ने उक्त टिमको विश्वास छ । विष्णु पौडेलले ओलीसँग सन्तुष्ट नरहेको संकेत केही समय अगाडि दिएका थिए ।