नेकपा माओवादी केन्द्रका अध्यक्ष पुष्पकमल दाहाल प्रचण्डले कांग्रेस–एमालेको गठबन्धन भत्काएर फेरि पनि माओवादी केन्द्रकै सरकार बन्ने दाबी गरेका छन् । उनले आफ्नो पार्टीसँग ३२ सिटको म्याजिक नम्बर रहेको बताउँदै चिन्तित नहुन कार्यकर्तालाई आग्रह गरे ।

माओवादी केन्द्रको काभ्रे-काठमाडौं सम्पर्क समन्वय समितिको चौथो भेला तथा प्रशिक्षण कार्यक्रममा प्रचण्डले म्याजिक सिटकै कारण अहिले नै चिन्तित हुनुपर्ने अवस्था नरहेकाे बताए ।

‘यही हलमा हो, तामाङ राष्ट्रिय मुक्ति मोर्चाको सम्मेलन थियो । मैले ३२ को हाम्रो संख्यालाई जादुको संख्या भनेको थिएँ, मेरो यही भनाइले उनीहरू अझै बढी उद्वेलित र तरंगित पनि भए होलान् । मैले त्यो नभनेको भए पनि हुन्थ्यो होला, तर पनि अहिले पनि हाम्रो संख्या म्याजिक नै छ भन्छु । किनभने ३२ भएकाले प्रमुख विपक्षी दलको नेता छ हाम्रो पार्टी, विपक्षी दल भनेको गभमेन्ट इन वेटिङ भन्छ पर्खिरहेको सरकार, यो सरकारलाई उल्ट्याएर बन्ने सरकार हाम्रै हो फेरि, त्यसकारण हामी चिन्तित हुनुपर्ने कारण छैन’, प्रचण्डले भने ।

एमाले र कांग्रेसका कतिपय नेताहरूले ३२ सिटको म्याजिक नम्बर रहेको बताएपछि प्रचण्ड नेतृत्वको सरकार फाल्न आफूहरूले सत्ता सहकार्य गरेको बताउने गरेका छन् । सरकार परिवर्तन हुनसक्ने हल्ला राजनीतिक वृत्तमा चलिरहेका बेला प्रचण्डको अभिव्यक्ति आएको हो ।