दुई हप्ता देखी निरन्तर संसद् अवरोध गर्दै आएका विपक्षी दलहरूले गृहमन्त्री लेखकको राजीनामाको अडानबाट पछि हटेको उनीहरूका पछिल्ला अभिव्यक्तिहरूले सङ्केत गरेका छन् । संसदको अवरोध हटाउने विषयमा ‘सेफ ल्यान्डिङ’ का लागि भाषा मिलाएर सहमति गर्ने तयारी गरिएको छ ।

प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले संसदको अवरोध खुलाउने विषयमा सहमतिको भाषा टुङ्ग्याउने चरणमा रहेको प्रतिक्रिया दिएका थिए । प्रचण्डले संसद खोल्ने विषयमा नेपाली कांग्रेसका सभापति शेरबहादुर देउवासँग  छलफल गरेका थिए ।

राष्ट्रिय स्वतन्त्र पार्टी (रास्वपा) आफ्नो अडानमा कायम रहे पनि माओवादी केन्द्र र एकीकृत समाजवादी गृहमन्त्री लेखकको राजीनामाको मागबाट पछि हटिसकेका छन् । उनीहरूले भिजिट भिसा प्रकरणमा छानबिन हुनुपर्ने माग त गरिरहेका छन् । तर, यसबारे हाल अख्तियार दुरुपयोग अनुसन्धान आयोगले छानबिन गरिरहेकाले अर्को समिति वा आयोग बनाउन नहुने सत्तापक्षको अडानमा उनीहरू लगभग सहमत भएको बुझिएको छ ।

सभामुख देवराज घिमिरेले समेत आइतबार साँझ बसेको प्रतिनिधिसभाको बैठकमा सत्तापक्ष र विपक्षी दलहरूबीच सहमति हुने सङ्केत आफूले पाएको बताउँदै सहमतिका लागि समय दिन सोमबार २ बजेसम्मका लागि बैठक स्थगित गरेको बताएका थिए ।

पछिल्ला दिनहरूमा भएका छलफलपछि सत्तापक्ष र विपक्षी दलहरू संसदको अवरोध खुलाउन सहमति नजिक पुगेका हुन् ।