काठमाडौं, –नेकपा (माओवादी केन्द्र) का केन्द्री सदस्य एवं योङ्ग कम्युनिष्ट लिग (वाईसीएल) नेपालका अध्यक्ष सुबोधराज शेर्पालीले प्रधानमन्त्री केपी शर्मा ओलीले अर्को द्वन्द्वको निम्तो दिएको टिप्पणी गरेका छन् । प्रधानमन्त्री ओलीले हिजो माओवादी सशस्त्र विद्रोहलाई हिंसा भनी अभिव्यक्ति दिएका थिए । ओलीको सोही अभिव्यक्तिमा असहमति जनाउँदै शेर्पालीले देशको प्रधानमन्त्रीलाई संविधान र कानुन बाहिर गएर बोल्ने छुट नरहेको बताएका छन् । उनले माओवादीलाई १७ हजारको हत्याराको आरोप लगाउने व्यक्ति देशको प्रधानमन्त्री हुनै नसक्नेसमेत टिप्पणी गरेका छन् ।

‘माओवादीलाई १७ हजारको हत्यारा भन्ने देशको प्रधानमन्त्री हुनै सक्तैन । किनकी प्रधानमन्त्री देशको मूल कानुन, अर्थात् संविधानको अधिनमा रहेर आफ्नो अभिव्यक्ति दिनेगर्छ । केपी शर्मा ओलीले दिएको अभिव्यक्ति गठबन्धन सरकारको प्रधानमन्त्रीले दिएको हो भने अर्को भीषण द्वन्दको निम्तोको संकेतका रूपमा यसलाई लिनुपर्छ,’– उनले भनेका छन् ।

त्यस्तै ओलीको अभिव्यक्ति एमाले पार्टी अध्यक्षको हैसियतमा भएको खण्डमा पनि संविधानले स्वीकार गरेको सशस्त्र संघर्ष, जनयुद्ध र जनआन्दोलनको मर्म र भावनाविपरीत हुने उनको भनाइ छ । पछिल्ला गतिविधिमा कांग्रेसको मौनता प्रधानमन्त्री ओलीको अराजकताले देशमा महासंकट निम्तिनसक्ने उनले संकेत गरेका छन् । ‘हेर्नलायक के छ भने, यी सबै गतिविधिमा कांग्रेसको मौनता र केपी ओलीको अराजकताका कारण देशमा ठुलो महासंकट निम्तन सक्छ । सचेत राजनैतिक दलहहरू, नागरिक समाज सबै सचेत बनौं । मुर्खको चंगुलबाट राष्ट्रलाई जोगाऔं,’– उनले भनेका छन् ।