काठमाडौं:- राष्ट्रिय स्वतन्त्र पार्टीका सभापति रवि लामिछाने जिम्मेवारीमा फर्किएका छन् । आज (सोमबार) पार्टी केन्द्रीय कार्यालयमा पत्रकार सम्मेलन गर्दै उनले आफू जिम्मेवारीमा फर्किएको बताएका हुन् । उनले आफू केही समय अझै शान्त बस्न खोजेपनि सरकारको कारण जिम्मेवारीमा फर्किनुपरेको बताए । उनले आफ्नो टाउकोमाथि सरकारले अझै पनि तरबार झुण्ड्याइरहेको बताए । उनले सरकारले आफ्नो टाउकोमाथि झुण्ड्याएको तरबार जतिबेला खसाले पनि थाप्न तयार भएर बसेको बताए ।

‘मैले सोचेको थिएँ– केही समय अझै विश्राम गरौं, केही समय अझै शान्त बसौं । पार्टीका साथीहरुले जिम्मेवारीपूर्वक आफ्नो बलले भ्याएसम्म काम गरिरहनु भएको छ । मलाई लागेको थियो, अझै शान्त बसौं, प्रक्रियामा सघाऔं । तर, सरकारले टाउकोमाथि तरबार झुण्ड्याउँछु भनेर एउटा जिल्लामा त अदालतमा मुद्दासमेत नबुझाएर राखेको छ । लागेको छ होला यो डराउँछ । कुनै पनि बेला शीरमाथि राखेको तरबार खसाल । म थाप्न तयार भएर बसेको छु । म जुनसुकै शक्तिसँग म लड्छु,’– उनले भने ।

साथै, सरकारले आफूलाई जिउँदै छाड्नु नै आफ्नो जित रहेको उनले बताए । सभापति लामिछानेले शरीरमा एकथोपा रगत रहेसम्म लुटतन्त्रको विरुद्धमा लडिरहने उद्घोष गरे । ‘यिनीहरुको दुई तिहाईको सरकारले मलाई जिउँदै छोडेको छ । यही नै मेरो जित हो । शरीरमा एकथोपा रगत रहुन्जेलसम्म यो लुटतन्त्रको विरोधमा उभिने छु् । जतिवटा मुद्दा लगाउनुछ, लगाउ । ज्यान मार्नुछ मार । मैले मेरो व्यक्तिगत जीवनको लागि कहिल्यै केही मागेको छैन, माग्नेवाला पनि छैन,’– उनले भने ।