काठमाडाैं,- प्रत्येक वर्ष पौष शुक्ल प्रतिपदाका दिन आज गण्डकी प्रदेशको मनाङसहित हिमाली क्षेत्रका हुम्ला, जुम्ला, डोल्पा, मुगु तोल ल्होसार मनाइँदैछ ।तोल ल्होसारलाई सबैभन्दा पुरानो पर्व मानिन्छ । ‘तोल’को अर्थ समयचक्र भन्ने हुन्छ । त्यसैले यो ल्होसारलाई समयचक्र ‘संवत्सर’ पनि भनिन्छ । तामाङ जातिले मनाउने सोनाम ल्होसारको विधिअनुसार यो पर्व मनाइन्छ ।सोनाम ल्होसार र तोल ल्होसार दुवै मनाउने तरिका एकै भए पनि दिन भने फरक पर्दछ छ । तामाङ जातिले भने आजको एक महिनापछि अर्थात् माघ शुक्ल प्रतिपदाका दिन यो पर्व मनाउँछन् ।तोल ल्होसार भुटान र तिब्बतका केही स्थानमा अहिले पनि मनाउने गरिन्छ । ‘ल्हो’ को अर्थ वर्ष र ‘सार’को अर्थ नयाँ भन्ने बुझिन्छ ।

हिमाली क्षेत्रका मानिस आज स्नान गरी शुद्ध भएर घर, आँगन लिपपोत गरी चोखो बनाउँछन् । लामा पुरोहित वा घरका मुख्य सदस्यबाट पूजापाठ गरिन्छ ।आकाश तिर गहुँको पीठो फ्याँकेर देवताको विजय हुने  र भूतप्रेतको पराजयको कामना गर्ने परम्परा रही आएको छ ।यस पर्वमा ठूला, बडा एवं मान्यजनबाट आशीर्वाद लिइ  बाबरी रोटी, फुरौला, कन्दमूल जस्ता भाेजन खाने गरिन्छ ।