अष्ट्रेलिया – गत शनिबार सिड्नीको ब्ल्याकटाउनस्थित बमन हल नेपालीहरूको उपस्थितिले खचाखच भरिएको थियो। झण्डै चार सयको हाराहारीमा उपस्थित पुरानादेखि नयाँ पुस्तासम्मका नेपाली दर्शकहरूको यो बाक्लो उपस्थिति कुनै साधारण जमघटका लागि नभएर, अष्ट्रेलियामा हुर्किरहेका नेपाली मूलका बालबालिकाहरूको प्रतिभा हेर्न र उनीहरूको हौसला बढाउनका लागि थियो।

नेपालबाट हजारौं किलोमिटर टाढा रहेर पनि बालबालिकाहरूले नेपाली भाषा, कला, संस्कृति र परम्परालाई यति सुन्दर ढंगले प्रस्तुत गरे कि त्यहाँ उपस्थित नेपाली मात्र होइन, कार्यक्रममा सहभागी विदेशी दर्शकहरू समेत दंग देखिन्थे।

पाँच दशक लामो गौरवशाली इतिहास बोकेको NAA

सन् १९७६ मा स्थापना भएको नेपलिज अष्ट्रेलियन एसोसिएसन (NAA) अष्ट्रेलियाकै सबैभन्दा पुरानो नेपाली सामुदायिक संस्था हो। विगत पाँच दशकदेखि नेपाली भाषा, कला, संस्कृति र समुदायलाई एकताबद्ध बनाउने उद्देश्यका साथ काम गर्दै आएको यो संस्था नेपाली समुदायको साझा घरको रूपमा स्थापित छ। कुनै समय अष्ट्रेलियामा नेपाल र नेपालीबारे जानकारी खोज्नेहरूका लागि अनौपचारिक दूतावासको भूमिका निर्वाह गरेको NAA आज पनि समुदायको अग्रणी संस्थाका रूपमा क्रियाशील छ।

बालबालिकाहरूको प्रतिभा उजागर गर्ने उद्देश्यले NAA ले पहिलो पटक सन् २०१२ मा ‘Children’s Talent Night’ आयोजना गरेको थियो। यस वर्ष सम्पन्न कार्यक्रम यसको चौथो संस्करण हो, जसले नयाँ पुस्तामा रहेको प्रतिभा, सिर्जनशीलता र सांस्कृतिक चेतनालाई उजागर गर्ने अवसर प्रदान गरेको छ।

संस्कृति हस्तान्तरणको साझा अभियान

यो कार्यक्रम केवल एउटा प्रतिस्पर्धामा मात्र सीमित रहेन। यसले नेपाली भाषा, कला र संस्कृतिलाई नयाँ पुस्तासम्म हस्तान्तरण गर्ने एउटा साझा अभियानको रूप लियो। नेपालभन्दा धेरै टाढा रहेर पनि आफ्ना छोराछोरीहरूलाई नेपालीपनसँग जोडिराख्ने अभिभावकहरूको प्रयास र बालबालिकाहरूको उत्साहले कार्यक्रमलाई अझ विशेष बनाएको थियो।

लगभग पाँच दशकको गौरवशाली यात्रापछि पनि NAA नेपाली समुदायको एकता, सहयोग र पहिचानको बलियो आधारस्तम्भका रूपमा निरन्तर अगाडि बढिरहेको छ।

आयोजकको प्रतिबद्धता र आभार

कार्यक्रमको समापनका अवसरमा NAA की अध्यक्ष निशा रानी राजभण्डारीले सहभागी बालबालिका, अभिभावक, निर्णायक मण्डल, स्वयंसेवक, प्रायोजक तथा कार्यक्रम सफल बनाउन प्रत्यक्ष र अप्रत्यक्ष रूपमा सहयोग पुर्‍याउने सम्पूर्ण व्यक्ति तथा संस्थाहरूप्रति हार्दिक आभार व्यक्त गर्नुभयो।

अध्यक्ष राजभण्डारीले ‘Children’s Talent Night’ जस्ता कार्यक्रमले नेपाली भाषा, कला, संस्कृति र पहिचानलाई नयाँ पुस्तासम्म हस्तान्तरण गर्न महत्वपूर्ण भूमिका खेल्ने विश्वास व्यक्त गर्दै आगामी दिनमा पनि यस्ता कार्यक्रमहरूलाई निरन्तरता दिने प्रतिबद्धता जनाउनुभयो। आयोजकहरूका अनुसार यस्ता कार्यक्रमले समुदायको भविष्यलाई अझ उज्यालो बनाउनेछ।