सुर्खेत – राष्ट्रिय स्वतन्त्र पार्टी (रास्वपा) ले ‘नीतिगत प्रस्थानका १०० आधार’ सहित आफ्नो चुनावी बाचापत्र (घोषणापत्र) सार्वजनिक गरेको छ।

फागुन २१ गतेपछिको सरकार र आगामी बजेटको स्पष्ट खाका प्रस्तुत गर्दै रास्वपाले मुलुकको अर्थतन्त्र र सुशासनमा आमूल परिवर्तन गर्ने उद्घोष गरेको छ। बाचापत्रको मुख्य बुँदा बाचन गर्दै उपसभापति डा. स्वर्णिम वाग्लेले अबको ५ देखि ७ वर्षभित्र नेपालको अर्थतन्त्रको आकार १०० अर्ब डलर (१०० खर्ब रुपैयाँभन्दा माथि) पुर्‍याउने महत्वाकांक्षी योजना प्रस्तुत गरे।

उनले भने, ‘काठमाडौंको मेयरका रूपमा बालेन शाहले देखाएको कार्यकुशलता र रवि लामिछानेले पार्टी निर्माणमा मोलेको जोखिमले आज वैकल्पिक शक्तिलाई एक ठाउँमा ल्याएको छ।’

रास्वपाले कृषि, पर्यटन, जलविद्युत र सूचना प्रविधि (आईटी) लाई अर्थतन्त्रको मुख्य खम्बा मान्दै कर्णालीका डाँडाकाँडा र फाँटहरूमा आर्थिक क्रान्ति ल्याउने सपना देखाएको छ। निजी क्षेत्रलाई ‘सरकारको ढोका चहार्नुपर्ने अवस्थाको अन्त्य गर्दै दैलोमै सरकार पुग्ने’ प्रत्याभूति दिलाइएको छ।

अन्त्यमा, रास्वपाले अस्थिर राजनीतिको अन्त्य र सुशासनका लागि यसपटक घण्टी चुनाव चिह्नमा मतदान गरी स्पष्ट बहुमत दिन आम मतदातालाई आह्वान गरेको छ। खुद्रा सुधारले मात्रै नपुग्ने भन्दै राजकाजको जहाजलाई नै सही दिशामा मोड्न ५ वर्षको स्थिर सरकार आवश्यक रहेको नेताहरूले औंल्याएका छन्।