काठमाडौं – आगामी शुक्रबार अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच अमेरिकाको अलास्का राज्यमा एक महत्वपूर्ण शिखर बैठक हुँदैछ। पुटिन १० वर्षपछि अमेरिका जाँदैछन् । सन् २०१५ पछि रुसी राष्ट्रपतिको यो पहिलो अमेरिका भ्रमण हो।

रुसी राष्ट्रपति कार्यालयका सल्लाहकार युरी उशाकोभले ऐतिहासिक रूपमा रुसको अधीनमा रहेको अलास्कालाई बैठकको स्थान बनाउनु उपयुक्त रहेको बताएका छन्। अलास्काका राज्य प्रमुख माइक डनलीभीले पनि राष्ट्रिय सुरक्षा, ऊर्जा स्रोत र आर्कटिक रणनीतिमा यस क्षेत्रको महत्वलाई ध्यानमा राख्दै यस्तो अन्तर्राष्ट्रिय बैठक आयोजना गर्नु उचित रहेको धारणा व्यक्त गरे।

बैठकको मुख्य एजेण्डा युक्रेन संकटको दिगो र स्थायी समाधान खोज्नु हुने अपेक्षा गरिएको छ। राष्ट्रपति ट्रम्पले केही भूभाग साटासाटको सम्भावनाबारे संकेत गरेका छन् भने रुसका विदेशमन्त्रीले युद्ध अन्त्यका लागि दुवै पक्षबीच समझदारी आवश्यक रहेको बताएका छन्।

यसबाहेक, प्राकृतिक स्रोतले धनी अलास्का र आर्कटिक क्षेत्रमा वातावरण संरक्षण, पूर्वाधार र ऊर्जा विकास मा दुई देशबीच सहकार्यको अवसरबारे पनि छलफल हुने रुसी लगानी प्रमुख किरिल दिमित्रिएवले जानकारी दिएका छन्।

युक्रेनका राष्ट्रपति भोलोदीमिर जेलेन्स्कीको बैठकमा सहभागिताको सम्भावना अझै अनिश्चित छ। राष्ट्रपति ट्रम्पले पुटिनसँगको भेटका लागि उनको उपस्थिति आवश्यक नरहेको बताएका छन्। यद्यपि, राष्ट्रपति जेलेन्स्कीले भने कुनै पनि शान्ति सम्झौतामा युक्रेनको पूर्ण सहभागिता नभएसम्म गरिने निर्णयहरू बाधक हुने स्पष्ट रूपमा बताएका छन्।