काठमाडौं – उद्योग, वाणिज्य तथा आपूर्ति मन्त्रालयका सचिव नारायणप्रसाद शर्मा दुवाडीले बजारमा ग्यासको वास्तविक अभाव नरहेको बताएका छन्।

उनले वितरण प्रणालीमा देखिएको समस्याका कारण अभाव सिर्जना भएको स्पष्ट पारे। मंगलबार उद्योग तथा वाणिज्य र श्रम तथा उपभोक्ता हित समितिमा भएको ग्यासको आपूर्ति व्यवस्थापनसम्बन्धी छलफलमा उनले यस्तो बताएका हुन्।

छलफलका क्रममा उनले भने, ‘कम्तीमा ७० लाख सिलिण्डर बजारमा आउनुपर्नेमा ५४ लाख सिलिण्डर मात्रै रिफिल भएर बजारमा आएको अवस्था देखियो।’

उनले थपे, ‘यो तीन महिनाको डेटा हेर्दा करिब २३ लाख सिलिन्डर रिफिल हुन सकेनन्।’

ग्यास सिलिण्डर पूर्ण रूपमा रिफिल हुन नसक्ने कारणबारे उनले भने, ‘जब हामी फुल सिलिण्डरमा आयौँ, ती सबै ग्यास सिलिन्डर एकैचोटि बजारमा आए।’

उनले थप प्रस्ट्याउँदै भने, ‘हाफ सिलिन्डरको बेला माग करिब ४६ हजार मेट्रिक टनको थियो। अघिल्ला वर्षहरूको डाटाले पनि यही रेन्जमा माग रहिरहेको अवस्था देखाउँछ।’

बजार माग बढेको सन्दर्भमा उनले भने, ‘जब हामी हाफ सिलिन्डरबाट फुल सिलिन्डरमा गयौँ, माग एकदमै माथि पुग्यो। अहिले माग करिब ६० हजार मेट्रिक टन पुगेको देखिन्छ।’

आगामी आपूर्तिको विषयमा उनले भने, ‘इन्डियन आयल कर्पोरेसनसँग कम्तीमा एक–डेढ महिनाको लागि थप ग्यास आपूर्ति दिन अनुरोध गरेका छौँ। अहिले ६० हजार मेट्रिक टन नै पूरा भइसकेको अवस्था होइन, करिब ५० हजार मेट्रिक टन छ।’

तथ्यांक प्रस्तुत गर्दै उनले भने, ‘५० हजार मेट्रिक टन पनि अघिल्ला आर्थिक वर्षहरूको यही महिनाको तुलनामा बढी हो। साउन १९ गतेसम्म आइपुग्दासम्म ३१ हजार मेट्रिक टन ग्यास आइसकेको छ।’

बजार व्यवस्थापनबारे उनले भने, ‘ग्यासको परिमाण अपत्यारिलो रूपमा अपर्याप्त होइन भन्ने यो डेटाबाट देखिन्छ। यो आपूर्तिको विषय र बजारभित्रको सर्कुलेसनको विषयलाई व्यवस्थित गरेर लानुपर्ने अवस्था छ।’

साउन १९ गतेसम्म ३१ हजार मेट्रिक टन ग्यास नेपाल भित्रिसकेको उल्लेख गर्दै उनले अझै केही समय ग्यास अपुग नै रहने बताए। उनका अनुसार ४१ जिल्लामा ग्यासको धेरै समस्या छैन। २८ जिल्लामा भने केही समस्या देखिएको छ र करिब आठ जिल्लामा विशेष व्यवस्थापन तथा निगरानी आवश्यक रहेको उनले बताए।