काठमाडौं – अनसनरत स्टाफ नर्स ज्योति रानाभाटप्रति ऐक्यबद्धता जनाउँदै वीर अस्पतालमा कार्यरत नर्स तथा स्वास्थ्यकर्मीले प्रदर्शन गरेका छन् । उनीहरूले मंगलबार अस्पताल परिसरमा प्लेकार्डसहित शान्तिपूर्ण प्रदर्शन गरेका हुन् ।

उनीहरूले ‘हामीलाई सरकारमात्र होइन बिरामीले पनि सम्मान गर्दैनन्’, ‘हाम्रो ब्लडप्रेसर होइन, तलब बढाऊ’, ‘उन्नत नर्सिङ अभ्यासको विकास’ लगायत नारा लेखिएका प्लेकार्ड बोकेका थिए ।

नर्सहरूको पारिश्रमिक तहअन्तर्गत हुनुपर्ने, श्रम शोषण अन्त्य हुनुपर्ने, नर्सिङ शिक्षा गुणस्तरको हुनुपर्नेलगायत माग लिएर नर्स रानाभाट गत साउन १४ गतेदेखि अनसनमा छिन् ।

नेपाल नर्सिङ काउन्सिलबाट अनसन शुरू गरेकी उनको स्वास्थ्य अवस्था बिग्रिएपछि वीर अस्पतालको आईसीयूमा राखिएको छ ।