काठमाडौं – प्रतिनिधि सभाको निर्वाचनबाट राष्ट्रिय स्वतन्त्र पार्टी (रास्वपा)ले स्पष्ट बहुमत हासिल गरेपछि नयाँ सरकार गठनको तयारी तीव्र बनेको छ । रास्वपा सभापति बालेन्द्र शाह चैत १३ गते प्रधानमन्त्रीका रूपमा नियुक्त हुने तयारीमा रहेका छन् भने सोही दिन प्रारम्भिक चरणका केही मन्त्रीले समेत पद तथा गोपनीयताको सपथ लिने तयारी भएको बताइएको छ ।

पार्टीभित्रको छलफलअनुसार पहिलो चरणमा चार महत्वपूर्ण मन्त्रालयको जिम्मेवारी टुंगो लगाइएको स्रोतहरूको दाबी छ । अर्थ मन्त्रालयमा स्वर्णिम वाग्ले, गृह मन्त्रालयमा डिपी अर्याल, परराष्ट्र मन्त्रालयमा शिशिर खनाल र सञ्चार तथा सूचना प्रविधि मन्त्रालयमा मनिष झालाई जिम्मेवारी दिने लगभग सहमति बनेको बताइएको छ । सरकारको प्रारम्भिक संरचनामै आर्थिक, सुरक्षा, कूटनीति र सूचना क्षेत्रलाई प्राथमिकतामा राखिएको देखिन्छ ।

रास्वपा स्रोतका अनुसार चैत १३ गते प्रधानमन्त्रीसँगै यी चार मन्त्रीलाई पनि सपथ गराउने तयारी भइरहेको छ । बाँकी मन्त्रालयका विषयमा भने पार्टीभित्र थप गृहकार्य जारी रहेको जनाइएको छ । सुरुवातमै संवेदनशील र प्रभाव पार्ने मन्त्रालयमा निर्णय गरेर सरकारको कामकारबाहीलाई छिटो गति दिने रणनीति अपनाइएको बुझिएको छ ।

नयाँ सरकार गठनसँगै रास्वपाले संघीय संसद्को नेतृत्व संरचना पनि आफ्नो राजनीतिक रणनीतिअनुसार मिलाउने तयारी गरेको छ । सभामुख पद आफ्नै दलले लिने र उपसभामुख पद नेपाल कम्युनिस्ट पार्टी (नेकपा)लाई दिने समझदारी आन्तरिक रूपमा बनेको बताइएको छ । यसलाई शक्ति सन्तुलन कायम गर्दै संवैधानिक र संसदीय प्रक्रियामा सहकार्य सहज बनाउने प्रयासका रूपमा हेरिएको छ ।

पार्टीका एक नेताका अनुसार उपसभामुख पदमा नेकपालाई स्थान दिएपछि संवैधानिक परिषद् लगायतका निकायमा सहमति र समन्वय सजिलो हुने अपेक्षा गरिएको छ । संवैधानिक नियुक्ति जस्ता संवेदनशील विषयमा अनावश्यक अवरोध नहोस् भन्ने सोचका साथ यस्तो अभ्यास अघि बढाइएको दाबी गरिएको छ ।

रास्वपाले बहुमत प्राप्त गरेसँगै जनताले दिएको जनादेशअनुसार तत्काल परिणाम देखाउनुपर्ने दबाब पनि बढेको छ । भ्रष्टाचार नियन्त्रण, सेवा प्रवाहमा सुधार, आर्थिक स्थायित्व, सुशासन र रोजगारी सिर्जना जस्ता विषयलाई केन्द्रमा राखेर सरकार अघि बढ्ने तयारीमा रहेको बताइएको छ । पार्टीभित्र अनुभव, कार्यक्षमता र प्राविधिक समझ भएका व्यक्तिलाई जिम्मेवारी दिने प्रयास भइरहेको दाबी गरिएको छ ।

प्रधानमन्त्री बन्न लागेका बालेन्द्र शाहले यसअघि नै नयाँ राजनीतिक संस्कार, पारदर्शिता र जवाफदेहितामा आधारित शासनको प्रतिबद्धता व्यक्त गर्दै आएका थिए । सोही प्रतिबद्धतालाई कार्यान्वयन गर्ने गरी मन्त्रीमण्डल चयनमा पनि कार्यसम्पादन क्षमता र सार्वजनिक उत्तरदायित्वलाई आधार बनाइएको स्रोतको भनाइ छ ।

अब चैत १३ गतेको सपथसँगै नयाँ सरकार औपचारिक रूपमा अघि बढ्नेछ । त्यसपछि पूर्ण मन्त्रीमण्डल विस्तार, सरकारको साझा कार्यदिशा, नीति तथा कार्यक्रम र आगामी बजेटको तयारीमा सरकार केन्द्रित हुने अपेक्षा गरिएको छ । जनताले परिवर्तनको पक्षमा दिएको मतलाई परिणाममा रूपान्तरण गर्न रास्वपाको नेतृत्वमा बन्ने नयाँ सरकारमाथि अब ठूलो परीक्षा सुरु हुने देखिएको छ।