सुर्खेत – नेपाली कांग्रेसभित्रको आन्तरिक गुटगत राजनीति र शक्ति प्रदर्शनको राप कर्णाली प्रदेशको राजधानी सुर्खेतमा प्रस्ट देखिन थालेको छ। कांग्रेसभित्र संस्थापन (देउवा) पक्षको बलियो नेतृत्व गरिरहेका निवर्तमान कार्यवाहक सभापति पूर्णबहादुर खड्का विगत तीन दिनदेखि आफ्नो गृहजिल्ला सुर्खेतमा छन्।

पार्टीको ‘बृहत् एकता’ का लागि भन्दै देउवा समूहले देशका विभिन्न प्रदेशहरूमा सांगठनिक भेला आयोजना गर्ने क्रममा कर्णालीमा पनि विशेष तयारी गरिएको हो। यसै सिलसिलामा शनिबार आयोजना हुन लागेको देउवा समूहको विशेष भेलालाई नेता खड्काले प्रमुख अतिथिका रूपमा सम्बोधन गर्ने कार्यक्रम रहेको छ।

कांग्रेसको चौधौँ महाधिवेशनमा संस्थापन पक्षकै बाहुल्यता रहेको कर्णाली प्रदेश कार्यसमितिले यो भेलाको आयोजना गरेको हो, जसको संयोजन गर्ने जिम्मेवारी कर्णाली प्रदेशका पूर्व मुख्यमन्त्री जीवन शाहीले पाएका छन्।

पार्टी एकताको नारा दिइएको यस भेलामा कर्णाली प्रदेशका सबै स्थानीय तहका जनप्रतिनिधिहरू, प्रदेशसभा सदस्यहरू, प्रतिनिधिसभा सदस्यहरू, कर्णालीबाट प्रतिनिधित्व गर्ने वर्तमान तथा निवर्तमान केन्द्रीय सदस्यहरूलाई आमन्त्रण गरिएको छ। यसका साथै सबै जिल्लाका पार्टी पदाधिकारी, सुर्खेत जिल्लाका वडा तहसम्मका जनप्रतिनिधि, पार्टीका स्थानीय पदाधिकारी र भ्रातृ तथा शुभेच्छुक संस्थाका अगुवाहरूलाई समेत बोलाइएको छ।

यद्यपि, विशुद्ध देउवा समूहको ब्यानर र रणनीतिमा बोलाइएको यो भेलामा सहभागी हुने वा नहुने भन्ने विषयमा कतिपय जनप्रतिनिधि र पार्टीका अन्य गुटका पदाधिकारीहरू भने अन्योलमा देखिएका छन्।

सहभागितालाई सुनिश्चित गर्नका लागि प्रदेशसभा सदस्यहरूलाई संसदीय दलमार्फत अनिवार्य उपस्थित हुन निर्देशनात्मक पत्राचार गरिएको छ भने पार्टी पदाधिकारीहरूलाई प्रदेश समितिमार्फत कडा सर्कुलर जारी गरिएको छ। आफ्नै गृहजिल्लामा हुन लागेको भेलालाई भव्य र बढी जनसहभागितामूलक देखाउन नेता खड्का आफैँ कार्यक्रमको दुई दिनअघि नै सुर्खेत आइपुगेर कार्यकर्ता भेटघाट र आन्तरिक रणनीति निर्माणमा तीव्र रूपमा जुटेका छन्।

यो भेलाको पृष्ठभूमि भने केही दिनअघि सुर्खेतमै सम्पन्न अर्को कार्यक्रमसँग जोडिएको छ। यसअघि वैशाख २८ र २९ गते कांग्रेसका सभापति गगनकुमार थापा, उपसभापति विश्वप्रकाश शर्मा र महामन्त्री प्रदीप पौडेल लगायतका संस्थापन इतर समूहका शीर्ष नेताहरूले सुर्खेतमा प्रदेशस्तरीय भव्य भेला गरेका थिए।

इतर समूहको सोही राजनीतिक सरगर्मी र उपस्थितिलाई सिधै चुनौती दिने उद्देश्यका साथ देउवा समूहले हतार-हतार यो काउन्टर भेला आयोजना गरेको कांग्रेस वृत्तमा चर्चा छ। यो भेलाले कर्णालीमा कांग्रेसको आन्तरिक समीकरण र शक्ति सन्तुलन कुन दिशातिर जान्छ भन्ने कुराको संकेत गर्ने राजनीतिक विश्लेषकहरू बताउँछन्।