आफूहरूको अगुवाइमा भएको जेनजी पुस्ताको आन्दोलन पुस्तान्तरणका लागि भएको औंल्याउँदै उनले अब पुस्तान्तरणको बहसलाई व्यवहारमा उतार्ने बेला आएको बताए ।

‘आन्दोलनको एउटा उपलब्धि भनेको जनताको मनमस्तिष्कमा पुस्तान्तरण हुनुपर्छ भन्ने चेत खुलेको छ । युवाहरूले गर्छन् वा नयाँले गर्छन् भन्ने आन्दोलनको आउटपुट हो । त्यसलाई सशक्त पार्न वा व्यवहारमा उतार्न आवश्यक देखिरहेका छौं ।

अब पुराना भनिएका पार्टीहरू अगाडि आउने कुनै नैतिक धरातल छैन । त्यसैले अब योङ भर्सेस योङ हुनुपर्छ, योङ भर्सेस ओल्ड होइन । त्यसकै लागि हामी नयाँ शक्ति बनाउन सबैलाई प्रोत्साहन गरिरहेका छौँ । नयाँ युवा शक्ति बन्नुपर्छ र युवाहरूले नै देशलाई बाटो देखाउनुपर्छ भन्ने हाम्रो अभियान नै हो,’ उनले नयाँ शक्ति निर्माण तयारीबारे स्पष्ट पारे ।

राष्ट्रिय स्वतन्त्र पार्टीले निर्वाचनमा ल्याएको नतिजालाई उनले ‘ल्यान्डस्लाइड भिक्ट्री’को संज्ञा दिए । आन्दोलनले पुराना पुस्तालाई विस्थापित गरेकाले पुराना भनिएका दलहरूलाई अगाडि आउने नैतिक धरातल सकिएको टिप्पणी पनि गरे । त्यसको फाइदा रास्वपाले लिएको उनले बताए ।

पुराना पार्टीहरूसँग जनताले सम्बन्धविच्छेद गर्न खोजेको ढुङ्गानाको तर्क थियो । ‘फागुन २१ को नतिजा अप्रत्यासित हो । पुरानालाई जनताले नरुचाएका हुन् । तर अब रास्वपाको अभिमतलाई पनि सधैं जनताले चित्त नबुझाउलान् ।

यतिबेला पुराना पार्टीसँग जनताले डिभोर्स गर्नुपर्ने अवस्थामा छन् । मिलापत्र गरेर काम छैन । अब नयाँलाई प्रेरित गर्न वा युवा शक्ति बनाउन हामी लागिरहेका छौं । पुस्तान्तरणका लागि सबैजना सङ्गठित भएर नयाँ र स्वच्छ सोच लिएर हामी सबै एक ठाउँमा आउनुहोस् भन्न पनि चाहन्छु,’ उनले भने ।

कुनै समय आफूले कांग्रेससँग धेरै आशा गरेको भए पनि त्यो अनुभूति गर्न नपाएको पनि उनले बताए । आफू आशावादी र सकारात्मक सोच बोकेको युवा भएकाले कसैप्रति पूर्वाग्रह नराख्ने उनले स्पष्ट पारे । नेपालमा अब आफ्नै माटो सुहाउँदो विचार आवश्यक रहेको बताउँदै ढुङ्गानाले ‘एडभान्स डेमोक्रेसी’का पक्षमा बहस सुरु गरेको जानकारी दिए ।

कुराकानीका क्रममा उनले ‘हनिमुन पिरियड’ पूरा गरेको सरकारको सुरुवाती चरण भएकाले तत्काल मूल्यांकन वा टिप्पणी गर्नु ठीक नहुने भन्दै सरकारले तयार गरेको सय बुँदे वाचापत्र हालसम्म ३०–४० प्रतिशत मात्र पूरा भएको पनि बताए ।

संघीय संसदमा प्रधानमन्त्री बालेन्द्र शाहको अभिव्यक्ति र उपस्थितिबारे ढुङ्गानाले प्रश्न समेत उठाए । ‘लोकतान्त्रिक मुलुकको संसदमा प्रधानमन्त्री जवाफदेही बन्नुपर्छ ।

प्रधानमन्त्रीलाई निर्वाचित गरेर पठाउँदा उहाँको सट्टामा पार्टीको सभापति वा परराष्ट्र मन्त्रीले बोल्नुपर्छ भनेर पठाएको होइन । उहाँ जान्ने, बुझ्ने र परिपक्व व्यक्ति भनेर प्रधानमन्त्री निर्वाचित गरेर पठाएको हो । त्यसैले जवाफदेही हुन उहाँ आफैं बोल्न आउनुपर्छ,’ उनले भने ।

प्रधानमन्त्रीका यस्ता गतिविधिले लोकतन्त्रलाई हानी पुर्‍याउने उनको आकलन छ । कूटनीतिक मर्यादालाई पनि प्रधानमन्त्रीले ख्याल गर्नुपर्नेमा उनले सुझाव दिए ।